Rusiyanın Ukraynaya hücumu buğda ticarətini dayandırdığı üçün qiymətlər son 14 ilin ən yüksək səviyyəsinə qalxıb. Çikaqo Birjasında buğdanın qiymətləri 2008-ci ildən bəri ən yüksək səviyyəyə qalxaraq, buşeli 10 dolları keçib. Ən əsas qida məhsullarından olan buğda ötən ay 30 faizdən çox bahalaşıb. Bu artımın isə onsuz da yüksək olan qlobal ərzaq qiymətlərinə daha da təsir edəcəyi gözlənilir.

Qeyd edək ki, dünya buğda ixracının 25 faizindən çoxu və qarğıdalı ixracının beşdə biri Rusiya və Ukraynanın payına düşür. İki ölkə arasında müharibə ABŞ və Avropanın Rusiyaya qarşı sanksiyalar tətbiq etməsi də taxıl bazarında çaşqınlıq yaradıb. İdxalçılar satınalma üçün bu 2 ölkədən başqa ölkələrə üz tutublar.

İqtisadçı Natiq Cəfərli Medianews.az saytına açıqlaması zamanı bildirib ki, bizim əmtəəlik, çörək üçün istifadə edilən buğdadan ciddi şəkildə asılılığımız var. Onun sözlərinə görə, Azərbaycan Rusiyadan 700 min tona yaxın buğda alır.

“Müharibədən, gərginlikdən əvvəl də Azərbaycanda unun və çörəyin qiyməti artmışdı. Çünki dünya bazarlarında da qiymətlərdə yüksəlmə var idi. İndi də düyna bazarlarda buna bənzər qiymət artımı gedir. Bunun da öz səbəbəbi var. Çünki Rusiya dünyada ən çox taxıl ixrac edən ölkələrdən biridir. Hətta bəzi illərdətaxıl ixrac edən ölkələr arasında birinci yerə çıxıb.

Ukrayna da həmçinin böyük taxıl ixracatçısıdır. İndiki dövrdə Ukraynada yaz əkini mümkün olmadığından, çox güman ki, Ukrayna bazarlara əlavə taxıl çıxarda bilməyəcək. Bu da indidən bazar oyunçuları tərəfindən nəzərə alınır və qiymətin artmasının ən böyük səbəblərindən biri budur”.

İqtisadçının sözlərinə görə, bu templə davam etsə, təssüf ki, bir müddətdən sonra qiymət artımı Azərbaycan bazarına da təsir edəcək.

“Azərbaycanda un məhsulları və çörəyin qiymətində artıma doğru dəyişiklik ola bilər”.