Dünyada münaqişə və müharibələrin sayı artmaqdadır. Amma elə həssas bölgələr və ölkələr var ki, orada baş verəcək silahlı toqquşmalar və ya genişmiqyaslı hərbi əməliyyatlar dünyanın böyük bir hissəsinə mənfi təsir edə bilər.

AzVision.az xəbər verir ki, bu mövzuda məqalə dərc edən Fransanın "Le Monde" nəşri bir sıra proqnozlar irəli sürüb. Məqalənin müəllifi, fransız jurnalist Alen Fraşonun fikrincə, 2022-ci ildə dünyanın üç regionunda silahlı münaqişələr başlaya bilər. Çünki hazırda sabitliyin pozulmasına gətirib çıxaracaq ən təhlükəli proseslər məhz bu 3 ərazidə müşahidə olunur.

Nəşr müharibənin başlaya biləcəyi ilk region kimi İranı göstərib. Çünki nüvə sazişi üzrə danışıqlar dalana dirənib, ortada isə daha az kompromis qalıb.

"Daily Express": 3-cü dünya müharibəsi altı məkanda başlaya bilər- Məlumdur ki, Tehran artıq uranın 60% zənginləşdirilməsi səviyyəsinə çatıb. Buna görə də ABŞ və İsrail İrana zərbə endirmək qərarına gələ bilərlər,- "Le Monde" ekspertə istinadən yazıb.

Nəşr digər təhlükəli bölgə kimi Tayvanı göstərib. Jurnalistin fikrincə, Çin getdikcə ada yaxınlığında daha çox hərbi təlimlər keçirir. ABŞ Pekinin tezliklə Tayvanı ələ keçirmək üçün hərbi əməliyyata başlaya biləcəyinə əmindir. Buna görə də Vaşinqton Taybeyi müxtəlif silahlarla təmin etməyi öhdəsinə götürdü. Lakin hazırda ABŞ prezidenti Co Bayden bu məsələdə qeyri-müəyyən mövqe sərgiləyir.

Təhlildə genişmiqyaslı müharibənin başlaya biləcəyi üçüncü region kimi Ukrayna ərazisinin adını çəkilir. Ekspert qeyd edib ki, NATO-nun şərqə doğru genişlənməsi və Rusiyanın ambisiyaları onu deməyə əsas verir ki, gec-tez bu təhlükəli hadisə baş verməlidir.

- Moskva aydın şəkildə bildirdi ki, alyans qırmızı xətti keçməməlidir. Bununla belə, NATO liderləri öz güclərinə arxayın görünürlər,- Fraşon yazıb./AzVision.az/