Ölkədə bu yağ "difsit" OLACAQ... - Qiyməti kəskin bahalaşacaq
Rusiya və Ukraynada davam edən müharibə fonunda Rusiya bir çox məhsulların ixracına qadağa qoyub.
Bundan əvvəl Rusiya avqustun 31-nə kimi Avrasiya İqtisadi Birliyi ölkələrinə Rusiyadan taxıl və şəkər ixracına qadağa qoyduğunu bəyan etmişdi. Bu addımın ardından isə günəbaxan yağı və tumunun ixracına qadağa qoyulması haqqında qərar qəbul edilib. Rusiya Kənd Təsərrüfatı Nazirliyi daxili bazarda sabitliyi qorumaq üçün aprelin 15-dən günəbaxan yağı ixracına müvəqqəti kvota tətbiq ediləcəyini açıqlayıb.
Rusiya Kənd Təsərrüfatı Nazirliyinin yazılı açıqlamasında günəbaxan yağı və günəbaxan tumlarına qlobal tələbatın artdığı vurğulanıb. Bu səbəbdən "Daxili bazarda sabitliyi qorumaq üçün aprelin 15-dən avqustun 31-dək günəbaxan yağı ixracına müvəqqəti olaraq kvota tətbiq edilib. Kvota məbləği 1,5 milyon ton olaraq müəyyən edilib”, - bildirilir. Aprelin 1-dən günəbaxan tumları və kanolanın ixracı da müvəqqəti olaraq qadağan edilib. Qoyulan qadağa günəbaxan yağı üzrə xaricdən asılı olan ölkələri əlavə yollar axtarmağa sövq edir.
Azərbaycan da ötən il 53 min 362 ton günəbaxan yağı idxal edib. Bunun 98 faizi Rusiyanın payına düşüb. Bununla yanaşı, ölkəmiz qarğıdalı yağını da idxal edir. Ötən il 12 ölkədən toplam olaraq 20 min 526 ton qarğıdalı yağı alıb.
Verilən qərarın Azərbaycan yağ bazarına təsiri necə olacaq? Bazarlarda yağ qıtlığı yarana bilərmi?
İqtisadçı Akif Nəsirli Cebhe.info-ya açıqlamasında ölkədə bitki yağlarının qiymətlərinin artacağını bildirib:
"Dünyada ən böyük bitki yağı istehsalçısı Ukrayna və Rusiyadır. Buna baxmayaraq, digər ölkələr də bu məhsulun istehsalı ilə məşğuldur. Azərbaycanda bitki yağlarına daxili tələbat o qədər yüksək deyil ki, ciddi qıtlıq yaransın. Dünyanın ən böyük iki bitki yağı istehsalçısının başı qarışıb, bazarlarda məhsulların sayı azalacaq. Dünyada bitki yağlarının qıtlaşması və bahalaşması mümkündür. Bu da Azərbaycana ancaq yağın bahalaşması kimi təsir edəcək. Bitki yağlarının tapılmaması kimi yox, bahalaşması kimi təsir edəcək”.
Ölkəmizdə bitki yağı istehsalının olmadığını deyən ekspert ilin əvvəlində yağdakı bahalaşmanın davam edəcəyini deyib: "Ölkəmizdə bitki yağı istehsalı, demək olar ki, yoxdur. Keçən ildən dünyada ərzaqların bahalaşması gedir. İdxal məhsulu olduğu üçün yağların qiymətlərinin artması Azərbaycana təsir edib. Bu bahalaşma yəqin ki, davam edəcək. Kvota qoymaq məhdudlaşdırmaqdır. Rusiya istehsalına görə Azərbaycana ixrac olunan məhsul çox kiçik həcmdir. Ola bilsin ki, Azərbyacana ixrac azalmasın, amma qiyməti bahalaşacaq. Düşünürəm ki, Azərbaycanda Fransa, İtaliya, Türkiyədəki kimi yağ qıtlığı yaranmayacaq”.
QAYNAR.MEDİA
