Müşahidələrimizə görə Ukrayna- Rusiya arasında müharibə başlayandan Qarabağdakı ermənilərin fəallığı artmağa başlayıb. Elə o vaxtdan ölkənin müxtəlif bölgələrində ermənilər atəşkəsi pozurlar. Tərtər, Füzuli, Qazax, Tovuz, Goranboy rayonları atışmaya məruz qalır.

Əslində bunu “atışma” kimi deyil, Azərbaycana qarşı bir mesaj kimi də dəyərləndirmək olar. Mesajın isə məğzi təxminən bu sözlərdən ibarətdi: “Nə edirəm, əcəb edirəm, cəsarətin var hücum et, susdur məni”.

Erməniləri belə fəallaşdıran hansı səbəblərdir bilisiniz!

Adalet.az xəbər verir ki, Rusiyanın Ermənistana əbədi himayədarlığı və Qarabağda erməniyə xidmət göstərən Rusiya sülhməramlılarının mövqeyi, üstəgəl, bir də Rusiyanın səlahiyyət sahibi olan məmurlarının erməni sevgisi hər zaman Ermənistanı saxta “Böyük Ermənistan” uğrunda mübarizəyə yönləndirib.

Rusiya rəsmisi Rusiyanın planını açıqladı

30 il ərzində - Qarabağımız ermənilərin işğalında inləyərkən ermənipərəst siyasətçilərin və Rusiyada yüksək mənsəb sahibi olan məmur və oliqarxların hər iki üzünü tanıdıq.

Rusiyanın Ermənistandakı fövqəladə və səlahiyyətli səfiri Sergey Kopırkin bütün açıqlama v hərəkətləri ilə harda durduğunu artıq ortaya qoyub. Onun bu günlərdəki açıqlaması erməniləri atəşkəsi pozmağa ruhlandıran ən mühüm “ümid işığı”dır.

Həmin açıqlamanı Moderator.az-da oxuyuruq:” Erməni mediasının yaydığı məlumata görə, Rusiyanın Ermənistandakı fövqəladə və səlahiyyətli səfiri Sergey Kopırkin Ermənistanın "Birinci kanalı"na müsahibəsində Moskvanın nə üçün "LXR" və "DXR", "Abxaziya" və "Cənubi Osetiya"nın müstəqilliyini tanıdığı, lakin "Artsax"ın "müstəqilliyi"ni tanımadığı sualına cavab verib:“Ermənistan da Dağlıq Qarabağın müstəqilliyini tanımayıb. Bunun yeganə səbəb olduğunu düşünmürəm. Biz bilirik ki, Dağlıq Qarabağ məsələsi, ümumiyyətlə, uzun illərdir ki, üzərində iş aparılıb və davam etdirilməkdə olan mövzudur. Bu məsələdə bizim mövqeyimiz çox yaxşı məlumdur”, - deyə Kopirkin bildirib.

Onun sözlərinə görə, bu məsələ bütün tərəflərin maraqları nəzərə alınmaqla həll edilməlidir: “Biz hər şeyi etmişik və edirik ki, bu həll yolu məhz belə şəraitdə tapılsın. Cənubi Osetiya və Abxaziyaya gəlincə, əvvəllər Rusiya Cənubi Osetiya və Abxaziyanı da Gürcüstanın bir hissəsi kimi tanıyırdı. Tbilisinin Cənubi Osetiyaya təcavüzü baş verəndən, Rusiya sülhməramlılarına hücum edildikdən sonra müvafiq addımlar atılıb”, - deyə Kopirkin vurğulayıb”.

Deməli, “ruhlandırılmış” ermənilər onlara hücum etməyimiz üçün atəşkəsi tez-tez, həm də müxtəlif istiqamətlərdə pozmağı amaclarına çatmaq üçün “mühüm yol” hesab edirlər.

Qarabağda “Ararat” erməni-rus regional mərkəzi nəyə xidmət edəcək?

Rusiya Sülhməramlılarının isə 44 günlük müharibədən sonra - 16 ay müddətində nələr etdiyini müntəzəm şəkildə sizlərə çatdırmışıq.

Ukrayna- Rusiya müharibəsi dövründə isə ermənilərin Qarabağda fəallaşmasına bir stimul da Rusiya SM gəlib. Beləki, Rusiyanın Ukraynaya yönəlik hücum təşəbbüslərini müdafiə edən ermənilər Qarabağın Rusiya sülhməramlılarının nəzarəti altındakı ərazilərində artıq həddlərini aşıblar. Erməni mediası yazır ki, Qarabağ separatçılarının “siyasi qüvvələri” Xankəndidə qondarma “Donetsk və Luqansk xalq respublikaları”nın tanınması hüququnun müdafiəsi üçün aksiya keçirəcək. Gələn həftə isə Qarabağda “Ararat” erməni-rus regional mərkəzinin filialı açılacaq, onun rəhbəri Rusiyada yaşayan Manvel Arakelyandır. “QHT”nin missiyası Ermənistan-Rusiya münasibətlərini dərinləşdirməkdir.

Deməli, arxalarında, dünyaya meydan oxuyan Rusiyanın nəfəsini hiss edən ermənilər ara qarışdırmaq üçün məhz rusların özündən istifadə etməyi qərara alıblar. Yəqin ki, Ermənistanın baş prokuroru Artur Davtyan regional səfər çərçivəsində İrəvana gələn Rusiya Federasiyasının baş hərbi prokuroru Valeri Petrovun başçılıq etdiyi nümayəndə heyətini qəbul etməsi də “rusdan yararlanma” prosesinə daxildir. Davtyan yarımsaatlıq çıxışının böyük hissəsini “yarınmaq- yaltaqlanmaq” prinsiplərinə uygun olaraq, Rusiya ordusunu tərifləyib. Qeyd edib ki, Ermənistan və Qarabağda yerləşdirilən Rusiya hərbçiləri Ermənistan Silahlı Qüvvələri və “Qarabağ Müdafiə Ordusu” ilə birlikdə erməni əhalisi üçün təhlükəsizlik təminatları yaradır, xüsusilə təmas xəttinə yaxın yaşayış məntəqələrində normal yaşayışı təmin edir.

Sonra Ermənistanın baş prokuroru Azərbaycandan şikayətlənib, erməni hərbi əsirlərin geri qaytarılması məsələsindən danışıb, daha sonra digər məsələlərin də müzakirəsini unutmayıb.

P.S. Rusiyanın Ermənistandakı fövqəladə və səlahiyyətli səfiri Sergey Kopırkinin erməni mediasına dediyi fikirlərinə inansaq, belə çıxır ki, Rusiya Qarabağı bizdən qoparmaq üçün mütləq yeni bir müharibə başlatmalı, Rusiyanın “Gürcüstan gedişi” planı həyata keçməlidir. Buna isə Azərbaycan tərəfinin bir həmləsi yetərmiş...

Gördüyünüz kimi, Qarabağın hazırkı durumu və ətrafındakı rus-erməni fəallığı yaxşı heç nə vəd etmir...

Əntiqə Rəşid