“Zelenski hazırda Ukrayna və onun xalqı üçün kilit şəxsdir. Aydın məsələdir ki, onun ölümü Ukrayna xalqının müqavimətini və qələbəyə olan inamını sarsıda bilər”.

Bunu Demokrat.az-a açıqlamasında politoloq Turan Rzayev bir qrup çeçen könüllünün Ukrayna əməliyyatına qatılmasını şərh edərkən deyib.

Politoloq qeyd edib ki, çeçenlərin əsas məqsədi Prezident Zelenskini ələ keçirmək və öldürməkdir:

“Zelenski öncə Putinlə danışıqlar masasına otumaq təklifi irəli sürdü, daha sonra Qərbin dəstək sözünə etimad edib bundan imtina etdi. Bu da təbii ki, Kremli qəzəbləndirdi. Hesab edirəm Rusiya Prezidenti Vladimir Putin çeçenləri Ukrayna müharibəsinə cəlb edərək iki şeyə nail olmaq istəyir. Birincisi, çeçenlərin qarşısına qoyulan əsas hədəf Ukrayna Prezidenti Vladimir Zelenski və mövcud Ukrayna hakimiyyətində Zelenskini əvəzləyə biləcək ehtimal şəxsləri ən qısa zamanda ələ keçirmək, lazım gələrsə öldürməkdir. Kadırovun “12 mindən çox döyüşçü "Ali Baş Komandan" Vladimir Putindən ən çətin tapşırıqların icrası üçün əmr gözləyir” sözləri də bunu təsdiq edir. Mümkündür ki, Kadırovun qeyd etdiyi ən çətin tapşırıq məhz Ukrayna Prezidenti Zelenskini aradan götürməkdir. İkincisi, Putin Ukraynanın Rusiya-Çeçenistan müharibəsində çeçenlərə verdiyi dəstəyi yaxşı bilir. Rusiyada yaşayan digər respublikaların deyil, məhz çeçenlərin prosesə cəlb edilməsi iki xalq arasında müharibə sonrasıda davam edəcək etnik gərginliyin zəmini yaradacaq. Çeçenlər Ukraynada sivil vətəndaşlara silah açsa, radikal islamçı davranışlar sərgiləsə, terror aktı həyata keçirsə, bu iki xalq arasında uzun illər davam edəcək etnik nifrətin əsasını qoyacaq”.