“Nə “Azərsu” yaxın durur, nə də Suraxanı Rayon İcra Hakimiyyəti...” - ŞİKAYƏT + VİDEO
Qaraçuxurdakı qəzalı yataqxananın sakinləri ölkə rəhbərliyindən kömək istəyir
“Görüntülərdə əks olunan problemlə əlaqədar olaraq, Nazirlər Kabinetinə, Milli Məclisə, Bakı Şəhər İcra Hakimiyyətinə, Suraxanı Rayon İcra Hakimiyyətinə, Baş Prokurorluğa, Daxili İşlər Nazirliyinə, Fövqəladə Hallar Nazirliyinə, 3 saylı Xüsusi Təyinatlı Mənzil-Kommunal Təsərrüfatı Birliyinə və “Azərsu” ASC-yə müraciət ünvanlamışıq. Amma təəssüf ki, adıçəkilən qurumların heç biri problemin həllində köməklik göstərməyiblər.”
Bu sözləri “AzPolitika.info”-ya müraciətində Suraxanı rayonu, Qaraçuxur qəsəbəsi Z.Şərifov küçəsi bina 24 ünvanında yaşayan şikayətçi Sədullayev Hamlet Elxan oğlu bildirib.
Qeyd olunan ünvandakı bina ailəvi yataqxanadır.
H.Sədullayev binanın 1980-ci ildə tikildiyini, lakin indiyə qədər binada heç bir təmir-bərpa işlərinin aparılmadığını bildirir: “Hal-hazırda bu bina qəzalı vəziyyətdədir. Binanın zirzəmisi su içindədir, kommunal xətlərin hamısı köhnəlib və sıradan çıxıb. Bu səbəbdən də, xətlərdə tez-tez qəzalar və sızmalar baş verir. Nəticədə də yuxarı mərtəbələrdən axan su beton plitələrin arasına dolur və mənzillərə axır. 2021-ci ilin avqustundan bəri bu problemdən əziyyət çəkirik. Görüntülərdən də aydın olur ki, yuxarıdan axan su mənzilləri yararsız hala salıb. Eyni zamanda binanın təməl strukturu da günü-gündən zəifləyir. Problemlə bağlı dəfələrlə aidiyyatı qurumlara müraciət etsək də, heç bir nəticəsi olmayıb”.
Şikayətçi H.Sədullayev problemlə bağlı ünvanladığı məktublara lazımı cavab verilmədiyini bildirir: “3 saylı Mənzil-Kommunal Təsərrüfat Birliyinə ünvanladığımız məktuba cavab olaraq bildirilib ki, 2012-ci ildən etibarən, su və kanalizasiya xətlərinin işinin təşkili İcra Hakimiyyətindən alınaraq, “Azərsu” ASC-nin tabeçiliyinə verilib. Ona görə də, qeyd olunan narazılıqla bağlı müvafiq quruma müraciət etməyimiz tövsiyyə olundu. Ancaq problemi nə “Azərsu” həll edir, nə də icra hakimiyyəti. Heç biri yaxın gəlmir.
Digər qurumlardan isə heç bir cavab ala bilməmişik. Bədbəxt hadisələr baş verməsin deyə bina sakinləri olaraq aiddiyyatı qurumların hamısına əvvəlcədən məlumat vermişik. Problemə etinasız yanaşanlar yəqin ki, yalnız hansısa bədbəxt hadisə baş verdikdən sonra tədbir görməyi düşünürlər”.
Şikayətçi qeyd edir ki, müraciət etdikləri qurumlar heç olmasa suyun məhz haradan axdığını müəyyən etmək üçün belə köməklik göstərmirlər: “Gəlib baxıb, çıxıb gedirlər. Heç olmasa təyin etmirtlər ki, binanın yüksək mərtəbələrindəki axıntının mənbəyi hardadır. Müəyyən etsələr, bəlkə öz hesabımıza bir təhər təmir edərdik. Ancaq bunu da etmirlər. Bu qədər etinasızlıq, biganəlik, öz işinə və insanlara qarşı məsuliyyətsizlik sakinləri bezdirib. Düşdüyümüz acınacaqlı durumla maraqlanan yoxdur!”.
Şikayətçi ölkə rəhbərliyinə və müvafiq qurumlara mətbuat vasitəsilə müraciət edərək, sözügedən binadakı acınacaqlı vəziyyəti aradan qaldırılmasını xahiş edirlər.
“AzPolitika.info”
Son xəbərlər
Ən çox oxunanlar
- Bu gün
- Bu həftə
- Bu ay