“Qarabağdakı “rusməramlıların” Xankəndi və ərtafından yaxın illərdə çəkilməsini təmin etmək üçün əzəli torpaqlarımızda yaşayan erməni əslilli azərbaycanlılarla, bizim vətəndaşlarla birbaşa təmasa keçməliyik, onların ölkəyə inteqrasiyası üçün çalışmalıyıq. Bunun yollarından biri də Xankəndi və ətrafında yaşayan erməni əsilli vətəndaşlarımızı kommunal xidmətlərlə təmin etməkdir”.

Qaynar.media Modern.az-a istinadən xəbər verir ki, bunu iqtisadçı ekspert, ReAl Partiyasının icraçı katibi Natiq Cəfərli bildirib.

Onun sözlərinə görə, bu gün həmin bölgəmizə işıq, qaz Ermənistandan, su isə ərtaf bölgələrdən gəlir.

“Bizim Ermənistanla hələ ki heç bir rəsmi münasibətlərimiz, müqavilələrimiz yoxdur – faktiki olaraq Ermənistan qaçaq yolla bizim ərazimizə elektrik enerjisi və qaz ötürür. Yəni, heç bir rəsmi müqavilələr olmadan ərazimizdə kommunal xidmət göstərir – bu yolverilməzdir. Azərbaycan dövləti Xankədi və ətrafında yaşayan vətəndaşlarımızı elektrik enerjisi, qaz və su ilə təminatını öz üzərinə götürməlidir. Ermənistandan gələn xəttlər kəsilməli, əvəzində bizim “Azərqaz”, “Azərsu”, “Azərenerji” Xankəndi və ətrafına yeni kommunikasiya xətləri çəkməli, erməni əsilli vətəndaşlarımızı həmin xətlərə qoşmalıdır. Sayğacların quraşdırılması və əhalinin siyahıya alınması baş verməlidir, ödənişlər üçün Xankəndi və digər yaşayış məntəqələrimizdə ödəniş aparatları qurulmalı, manatla ödənişlərin qəbuluna başlanmalıdır. Hətta, Xankəndi və ətrafında yaşayan təqaüd yaşında olan erməni əsilli vətəndaşlarımıza pensiya ayrılmalı, onlara bank kartları paylanılmalı, ərazidə bankomatlar quraşdırılmalıdır”.

N.Cəfərlinin sözlərinə görə, belə addımlar Xankəndi və ətrafında yaşayan erməni əsilli Azərbaycan vətəndaşlarının ölkənin kommunikasiya xətlərinə və maliyyə sisteminə inteqrasiya edilməsinin başlanğıcı olacaq.

“Əgər Ermənistandan qeyri-qanuni gələn xətlər kəsiləcəksə, orada yaşayan insanların bizim sistemə inteqrasiya olmaqdan başqa çarələri qalmayacaq. Hə, sual yaranacaq ki, Kreml buna imkan verəcək?! Bu imkanın əldə edilməsinin də yolları var – nəticə etibarı ilə Moskvaya fərq etmir ki, o elektriki, qazı kim təmin edir, hətta könüllərini pulla almaq üçün Rusiyadan aldığmız qazın, enerjinin həcmini bir az da artıra bilərik, başqa yollar da var, hər şeyi açıq demək də olmur”.


N.Cəfərli onun bu təkliflərini sosial şəbəkələrdə süngü ilə qarşılayanlara belə cavab verib:


“Demirsiz ki, Xankədiyə nəzarət etməliyik? Onda bəs, dövlət öz vətəndaşına kommunal xidmət göstərməli deyil, təqaüd ödəməli deyil?! İstəmirsiz “rusməramlılar” ordan çıxsın?! Bunun tək yolu erməni əsilli vətəndaşlarımızın ölkəyə inteqrasiyasıdır! Başqa nə yol təklif edirsiz?! Hücum edib Moskvaya qədər gedəcəksiz?! Biz erməni əsilli vətəndaşlarımızı dışladıqca, onlar rusun qucağına daha bərk oturacaq və onları o qucaqdan qoparmaq mümkünsüz olacaq. Zatən Kreml o qondarma qurumu de-fakto tanıyıb, biz aktiv olmasaq, məqamı gəlsə, “rusməramlıların” burnu biz tərəfdən qanasa həmən “de-jure” də tanıyacaqlar – bunu istəyirsiz?! Siyasət məsuliyyətli işdir, bacarıq, elm, analitik düşüncə tələb edir, bəziləri elə bilir ki, siyasət qışqırmaqdır, yekə-yekə danışmaqdır”.